Unang Maila Marhata Batak

Unang Maila Marhata Batak
Agus Swandy Simanungkalit


NAJOLO, adong do sahalak napistar margoar Profesor DR Kern sian Nagori Nederland. Tubu ibana taon 1833, dung magodang jala dung timbo singkolana, mangajari ma tuan on di Utrecht, Berlin dohot di Laiden bidang tata bahasa.

POLA do lobi satonga portibion didalani ibana holan laho mangguruhon angka hata ni bangso na adong di Parpuloan. Jala leleng muse do ibana di Indonesia laho mangguruhon hata Jawa dohot hata Kawi (Jawa totok) laho padomuhon tu hata Sanskrit (hata Hindu) tu hata na adong di Indonesia. Mangihuthon pandokna, leleng muse do tuan Kern ondeng di Tano Batak laho mangguruhon hata Batak nauli I ditingki masa ni Ugamo Malim. Sian Tano Batak, borhat ma ibana muse tu Roma laho padomuhon hata Inggeris tu hata Roma jala dijou ma ibana muse mangajari di Universitas Utrecht sahat tu namarujung ngolu .

Mangihuthon pangokkuonna di sada buku natininggalhonna, di Nederland molo diuhal tu hata batak margoar “Tano dohot Hata Batak do Hata ni Tondi”. Jala tarida do disi taringot angka hata naung ginuruhonna saleleng dingoluna mandok, hata naummora jala hata nasumurung sian hata na adong di parpuloan na adong di banua tonga on, ima hata Tagal di Pilifina, hata Batak, hata Jawa, napaopathon ipe asa hata Melayu (Indonesia) taringot tu dengganna.

Alai, molo binereng do dipudian ni ari on, nunga lam torop be halak Batak naso mangargahon hatana sandiri hira na gabe mangkailahon hata ni ompuna manang natorasna. Nunga pola tahe “HARAM” di roha ni na deba halak batak laho mangkatahon hata batak i, sai marhata naleban nama nasida dohot ianakhonna di bagasna be. Ujungna, nunga lam torop be angka dakdanak ni pangaranto naso umboto hata batak ala ndang pola dihaporluhon natorasna laho mangajarhon hatana. Tangkas tabereng do nuangen langgus ni na deba halak Batak ditingki martangiang pe di bagasna nunga ummalo marhata naleban sian hatana sandiri. Hape, tubu jala magodang di bonapasogit dope nasida. Alani kemajuan namanosak, tung mansai maila do ibana marhata batak tung pe diparadatan marhite angka hata umpasa.

Boi do berengonta sai adong do angka raja ”Parhata Naposo” pasega-segahon hata batak i marhitehon hata umpasa.isarana, Bintang narumiris tu ombun nasumorop .Anak pe riris di hamu, boru pe tung torop”. Alani jalmit ni pamangan gabe mandok, “mamolus halak Inggeris sipatuna mardorop. Anak pe riris, boru pe tung torop”.

On ma umpasa napaleahon hata batak dohot pametmethon kebudayaan ni habatahon i.

Aha do alana umbahen nasongoni halak hita? Adong do i, alani angka parsaoran dohot angka bangso na asing gabe tarpaksa gabe marhata naleban asa boi masiantusan. Ianggo ala ni i do, denggan do i. Ai molo godang ragam ni hata taantusi, dalan tu hamajuon do i di bangsonta. Alai adong do di nadeba sian lea ni roha mardongan hailaon laho mangkatahon hata batak nauli i, hape gabe ujungna mamboan haliluon ni pomparanna di sogot niari. Sai adong do halak Batak molo marhata batak, asa songon namaju dihilala rohana ibana, godang ma dipassaorhon hata naleban tu bagas hata batak i, hape ndang dihilala naung gabe mangorui hapolinon dohot arga ni ni hata batak i do ibana.

Tangkas taboto do molo lam godang simbora laho laok ni sere dibahen tukang mas, gabe mangorui arga ni sereinon doi. Suang songoni do hata batak nauli i. Molo godang laok ni hata i, gabe soadong be lapatan ni hundulanna. Hape, hata ni Tuhanta namandok, “siulaon do an, alai unang ma tading nasadaan,”(Mat .23:23).Lapatanna, sai taparhamaol ma hatanta i, asa martua hita di gomgoman ni Ompunta. Ai hata i do hangoluan, jala hatai do hamagoan. Ai molo ingot hita di hatanta i, tagamon dope adong bangso Batak di banua tonga on. Alai, molo so adong be hata batak nauli i, gabe bangso aha nama hita dohonon? Paling dohonon gabe bangso namago sian bonana. Aha do hamoraon dohot hinadenggan ni hata batak i huroha?. Ima holan di hata batak do didok Professor DR Kern, adong umpasa sampe opat horong hinanidokna. Ima : 1. Umpasa namarisi habisuhon. (filsafah). 2. Umpasa namarisi Hasangapon (Etika kesopanan) 3. Umpasa tu Adat DalihanNatolu (Undang-undang, hukum). 4. Umpasa namardomu tu Parsaoran. (Kemasyarakatan). Jala holan di hata batak do sada lapatan tolu dohot opat pandohanna. Isarana, baba =pamangan+simangkudap. Ngingi = Ipon + Pangalo. Obuk = jambulan + Sitarupon, lan dope angka naasing. Alai, ala so digurathon ompu naparjoloi angka ruji-ruji ni paradatan dohot angka umpasa nabinahenna, gabe lam mago ma hata i ala so dibungkuhon.

Hinorhon ni i ma “Tabloid HORAS” ro muse laho painu-inuhon angka rumang ni ruhut di habatakon dohot patulushon hata batak nasintong pangkatahonna. Mauliate.

0 komentar:

Posting Komentar

Kembali ke atas ↑